Бүтэн сайн өдөр гэртээ бүтээлээр өнжив. Хийнэ гээд бодоод явсан пад эрхиэ хийлээ дээ. Ойр мод бариагүйг хэлэх үү гар эвлэж өгдөггүй. Багаж хэрэгсэл маань ч бараг зэврэх дээрээ тулсан байна. Пад эрхи хийсэн энэ модыг Brazilian cherry гэдэг, хүрэн занданаас хатуу мод байна. Бодвол ум хар хавьцаа ч очих хатуу мод биз ээ. Энэ модыг Ganbold Tsoodol дүү юм хийгээд илүү гарсныг нь надад өгсөн юм. Бараг шагайн зурхай хийгээд илүү гарсан эд байх. Би л лав энэ модыг аваад 4-5 жил дарсан байх аа.

Бороо орчихмоор байна уу даа гэмээр бүрхэг өдөр байна. Америкчуудын дотор ч бүрхэг буй нь ярианаас нь илт ажиглагдана. Трамп Ерөнхийлөгчийн хэлж буйгаар бүх юм хүрдан сайхан хэвэндээ орж байна, "үүнээс илүү муу болох байсныг би тулдаа энэ зэрэгт хязгаарлан барьж байна" хэмээн их л цээжээ дэлдэж байна. Үнэн эсэхийг түүх дараа нь гэрчлэх биз ээ. Хүмүүсийн уур хилэн намжиж, бослого тэмцэл суларсан хэдий ч тэдний сэтгэлийн шарх аних яагаа ч үгүй байна. Америкийн өнөөгийн нийгэм бол асар үнэтэй шаазан ваарыг газар алдаж унагаад, эргүүлээд хагархайгаар нь зүйгээд цавуудалцаж наасан мэт болжээ. Хагарсан ваар хэдийвээр бүтэн харагдах ч үнэ цэнэгүй болсон байдаг билээ. Тэгвэл Америкийн нийгэм түүнтэй адил үнэ цэнэгүй болсон мэт харагдаж байна. Энэ нийгмийг үнэ цэнэгүй болгосон бурууг корона вирус дэгдэн гарсан Хятадаас хайж байна. Үнэн хэрэгтээ ямарч сэргийлэх арга хэмжээ хийхгүй байсаар оруулж ирсэндээ өөрсдөө буруутай л даа. Бусад хямрал нь нийгмийн бухимдлаас үүдэлтэй болохоор нэг л гал алдвал дарьтай торх мэт дэлбэрч байна гэсэн үг.

Карантины үеэр хүмүүс машин бага барьж байгаа, үүнээс үүдээд замын аваар осол бага, зардал багассанаас зарим машины даатгалын компаниуд төлбөрөө бууруулах, бага зэрэг буцаалт олгох зэргээр хэрэглэгчдээ харж үзэж байгаа билээ. Доор компаниудын олгосон хямдралыг хараарай.

Амралтын өдөр тул раажав хүүгээ сонсолгүй, ертөнцийн чимээнээс тасарч, өөрт төлөвлөсөн зүйлээ нухсаар өдрийг барав. Олон жилийн өмнөөс Лувсанхайдав гуайн намтрыг яриулж, хуурцагт шингээж ирсэн билээ. Түүнийгээ бага багаар сийрүүлсээр бараг дөхсөн ч тухайн цаг үеийг тодруулж, түүхэн үйл явдлуудтай холбохоор мэрийж, ном судрын хуудас эргүүлж мунгинасаар мөн их уджээ. Яагаад Хайдав гуайн намтрыг тэмдэглэх болсноо хэлье.

Өнөөдөр раажав хүү цагдаад алагдсан хар залуу, 1989 онд болсон Тиан-Ан-Мин талбайд болсон аллагын тухай туж ярилаа. Дандаа мэддэг яриа занги давтагдав. Корона вирусын халдварын тухай тун бага ярьж, бараг түүнийг мартагдахад хүрчээ. Талийгч хар залуугийн оршуулга нь өнөөдөр болсон юм байна. Тиан-Ан-Мин талбайд амь үрэгсдийн дурсгалд зориулж, Гонконгт жил бүр жагсаал хийж ирснийг энэ жил Хятадын төр хорьсон ажээ. Корона вирусээр тус улсад 21 мянган хүн нэмж өвчилж, мянга илүү хүн хорвоог орхижээ. Цар тахал буурах яагаа ч үгүй байхад элдэв дажин, тэмцэл тасрахгүй, жаахан онцгүй л цаг үе ирсэн байна шүү.

Жагсаал цуглаан, үймээн самуун арай намжиж байна. Гэхдээ л болоогүй янзтай. Том хотууддаа намжсан нь цагийн хязгаартай хорио тогтоосонтой холбоотой. Сан Франциско хотыг тойрсон жижиг хотуудад дэлгүүр ухсаар л байна. Цуглаан жагсаалыг сэвсэн нөхөд нь харууд, хулгай тонуул хийсэн нь харууд, тэгээд энэ ёс бус газар авахаар харуудын эсрэг сэтгэгдэл нийгэмд төрүүлж, "ер нь эд нар чинь ийм л гэмт хэрэгтнүүд, тэгэхээр цагдаа нар хатуу тэмцэх нь зөв, хааяа мэргэжлийн алдаа гаралгүй яах вэ" гэсэн ойлголтыг өгч эхлэв.